पक्षिमित्र

संपादक – किरण मोरे

महाराष्ट्र पक्षीमित्र चे 37 वे संमेलन अहिल्यानगर जिल्ह्यातील शेवगाव येथे 1 व 2 फेब्रुवारी 2025 रोजी संपन्न झाले. न्यू आर्ट्स, कॉमर्स व सायन्स कॉलेजच्या यजमानपदाखाली हे संमेलन यशस्वीपणे पार पडले. तालुक्याच्या ठिकाणी आणि एका महाविद्यालयाने पुढाकार घेऊन केलेले हे पहिलेच संमेलन. त्यामुळे या आडवाटेवरील ठिकाणी असलेल्या या गावात किती लोक येतील अशी शंका अनेकांना होती. महाविद्यालयात असलेले संमेलन कसे असेल असाही प्रश्न बऱ्याच जणांना पडला असावा. मात्र या सर्व शंका व प्रश्नांचा कुठलाही विचार न करता आयोजकांनी अथक परिश्रम व अचूक नियोजन करून संमेलन यशस्वी करून दाखवले. शेवगाव सारख्या ठिकाणी संपूर्ण राज्यातून शंभरहून अधिक पक्षीमित्र पोहोचले.