महाराष्ट्र पक्षिमित्रचे पुरस्कार (२०२५) जाहीर

स्व. रमेश लाडखेडकर स्मृती जीवन गौरव पुरस्कार संभाजीनगर येथील जेष्ठ सभासद डॉ. दिलीप दिवाकर यार्दी यांना जाहीर करण्यात आला आहे. रोख रक्कम, मानपत्र आणि स्मृतिचिन्ह असे पुरस्काराचे स्वरूप असून हा पुरस्कार विदर्भ पक्षिमित्र मंच द्वारे डॉ. अनिल पिंपळापुरे यांचे तर्फे प्रायोजित करण्यात आलेला आहे.

स्व. डॉ. जी. एन. वानखेडे स्मृती पक्षी संशोधन पुरस्कार पक्षी अभ्यास, संशोधन, आणि त्यातून संवर्धन असे कार्य करणाऱ्या वरुड जि. अमरावती येथील श्री. प्रतिक चौधरी यांना जाहीर करण्यात आला आहे.

नामदेवराव बहादुरे स्मृती पक्षी संवर्धन व सुश्रुषा हा पुरस्कार पक्षी संवर्धन, तथा जखमी पक्षी प्राणी उपचार आदी क्षेत्रात कार्यरत अकोला येथील मानद वन्यजीव रक्षक श्री. बाळ उर्फ जयदीप काळणे यांना जाहीर करण्यात आला. हा पुरस्कार नागपूर येथील महाराष्ट्र पक्षिमित्रचे सदस्य श्री. अनिल बहादुरे यांचे तर्फे प्रायोजित करण्यात आला आहे.

स्व. रामभाऊ शिरोडे (वाणी) स्मृती पक्षी जनजागृती पुरस्कार पक्षी अभ्यास, नोंदणी, सर्वेक्षण आणि पक्षी विषयक जनजागृती आदी क्षेत्रात कार्यरत वाशीम येथील श्री. मिलिंद सावदेकर यांना यांना जाहीर करण्यात आला आहे. हा पुरस्कार श्री. अविनाश शिरोडे, नाशिक यांचे तर्फे प्रायोजित करण्यात आलेला आहे.

या वर्षीपासून नव्याने सुरु करण्यात आलेला स्व. प्रकाशसिंह नारायणसिंह मोरे स्मृती उदयोन्मुख पक्षिमित्र पुरस्कार शाळा महाविद्यालयात शिकणारे विद्यार्थी पक्षीमित्रास हा पुरस्कार देण्यात येत असतो. यावर्षीचा हा पुरस्कार साकोली जि. भंडारा येथील विकास बावनकुळे या नवोदित पक्षिमित्रास जाहीर करण्यात आला आहे. हा पुरस्कार महाराष्ट्र पक्षिमित्रचे सदस्य श्री. किरण मोरे यांचे तर्फे प्रायोजित करण्यात आला आहे.   

दरवर्षी पक्षिमित्र संमेलनाच्या आयोजकांकडून निवड करून नवोदित पक्षिमित्रास दिला जाणारा स्व विनोद दिगंबर गाडगीळ पुरस्कार यावर्षी आयोजकांकडून याच वेळी जाहीर करण्यात आला असून हा पुरस्कार इयत्ता दुसरीत शिकणाऱ्या कुमार अर्पित अक्षय चौधरी या बालकास जाहीर करण्यात आला आहे.